LAOAG CITY – Dakkel a bentahe para iti Pilipinas ti panag-withdraw ti Cambodia iti maisaysayangkat a 33rd Southeast Asian Games.
Daytoy ket kalpasan nga inrakurak ti Cambodian National Olympic Committee ti naan-anayen a panagsanudda iti nasao a dakkel nga sporting event.
Segun ken ni Bombo International News Correspondent Toto Cadapan manipud idiay Thailand, iti naudi a Southeast Asian Games, nagun-od ti Cambodia ti maikapat a puesto idinto a maikalima met ti Pilipinas.
Kunana a nakaladladingit ti nagbalin a desision ti Cambodia gapu ta naka-all set aminen dagiti kasapulan dagiti atleta iti panagay-ayamda.
Nupay kasta, inbatadna a maawatanda ti gagem ti Cambodia a para met laeng ti kinatalged dagiti umaayamda ti inaramidda nga addang tapno maliklikan ti saan a napintas a mapasamak kadakuada gapu iti agtultuloy a rinnupakda iti Thailand.
Inlawlawagna a nagatendar pay dagiti amin nga athletes ken delegates ti Cambodia ti opening ceremony ti 33rd Southeast Asian Games sakbay a nagbabawida a makilaban iti kompetision.
Innayonna nga iti panangrugi pay laeng ti ay-ayam ket nagun-oden ti Pilipinas ti maikatlo a puesto kalpasan a nangabak ni John Derrick Farr ti bronze medal para iti MTB downhill idinto a naala met ni Justin Kobe Macario ti gold medal para iti taekwondo freestyle poomsae.
