LAOAG CITY – Mamati ni House Deputy Minority Leader at ACT Teachers Party-list Rep. Antonio Tinio nga ad-adda ita a kumaro ti pungtot dagiti umili gapu iti korapsion mainaig iti flood control corruption scandal.
Inrakurak daytoy ni Tinio iti baet ti mapaspasaran a nakaro a panagtudo ken panaglayos gubuay iti epekto ti Bagyo Tino.
Inbatadna a tunggal panagtutudo, panagbabagyo ken panaglayos ket makapungtot dagiti naruay a tattao gapu ta awan pay ti nadusa kadagiti karaman iti maanomalya a flood control projects agpapan kadagitoy a gundaway.
Inpalagip ni Tinio iti gobierno a nasken a masapulen a maisardeng ti korapsion ken siguradoen a mapagsungbat dagiti karaman manipud iti Malacañang.
Nagpanawagan daytoy nga ikkatenen ti pork barrel system.
