LAOAG CITY – Kalikagum ni Senador Sherwin Gatchalian nga ad-adda pay a papigsaen ti papel dagiti lokal a gobierno iti sektor ti edukasion kagiddan iti mailunglungalong a panangamendar iti Local Government Code tapno maipangato ti kabaelan a pinansial dagiti local government unit (LGU).
Inbatad ni Gatchalian, nasken a gundawayan daytoy a reporma tapno saan laeng a mapapigsa ti pundo ti lokal a gobierno no diket mapasayaat pay ti kalidad ti edukasion iti sakupenda.
Iti babaen ti gakat a 21st Century School Boards Act (Senate Bill No. 53), gagem a palawaen ti komposision ken responsibilidad dagiti Local School Board tapno agbalin nga ad-adda nga epektibo ti papelda iti panangimaton ti edukasion iti lokal a tukad.
Karaman kadagiti responsibilidad dagiti board ti panangbukel dagiti pagannurotan a mangtutok iti panangpasayaat ti kalidad ti edukasion iti lugarda.
