LAOAG CITY – Nangipeksa ti pannakaalarma ti Parents Against Vape (PAV) iti agtultuloy a panagbaba ti tax rates kadagiti produkto a tabako ken vape kalpasan nga inpila ni 2nd District Ilocos Sur Representative Kristine Singson-Meehan ti House Bill 11279.
Inpetteng ti Parents Against Vape a saan a nasken nga isakripisio ti salun-at dagiti agtutubo a Pilipino iti babaen ti panangsuporta iti HB 11279.
No maipasa ti nailungalong a gakat, nangipeksa ti panagdanag ti Parents Against Vape a mabalin a mangitunda daytoy ti dakkel a problema iti salun-at kadagiti agtutubo kas ti kanser nga adda ti pakainaiganna iti tabako, sakit iti puso ken sakit iti panaganges para kadagiti produkto a tabako ken vape no bilang a nalaklaka.
Gagem ti HB 11279 a temporario a masuspenso ti lima a porsiento a tinawen a panagngato ti buis kadagiti sigarilio ken dadduma pay a produkto a tabako agingga inton 2026.
Immuna iti daytoy, binabalaw met ti Sin Tax Coalition dagiti author ti HB 11279 iti panawagan para iti briefing ti Committee on Ways and Means tapno talantanen ti nasao a gakat.
