LAOAG CITY – Nagtalinaed ti arapaap a maaddaan ti Ilocos Norte ti maipasdek a district hospital iti umabagatan a paset ti probinsia.
Daytoy ti pinasingkedan ni Dr. Rogelio Balbag, Executive Director ti Hospital Management Council ti gobierno probinsial ti Ilocos Norte.
Segun kenkuana, maysa daytoy kadagiti kalikagum ni Gob. Matthew Marcos Manotoc.
Kunana a maysa kadagiti lugar a maikunkunsiderar a pakaiyestablisaran ti South District Hospital ti Ilocos Norte ket iti ili ti Badoc.
Inbatadna a maysa daytoy kadagiti gagem ni Department of Health Usec. Maria Rosario Vergeire iti ibibisitana iti nadakamat nga ili gapu ta karaman daytoy iti Health Development Plan ti probinsia.
Inlawlawagna nga iti pannakitartaripnongna iti Department of Health ket siaanamongda nangnangruna iti Department of Health Region 1 ken ti Mariano Marcos Memorial Hospital and Medical Center.
Kunana a mamati dagitoy a makatulong ti nasao a ganuat tapno maalay-ayan ti kaadu dagiti maiserserrek a pasiente iti nadakamat nga ospital.
Mangnamnama ni Balbag a daytoy nga ibibisita ni Vergeire iti ili ti Badoc ti mangitunda iti pannakaadal a naimbag ti kalikagum a pannakaiyestablisar ti District Hospital iti abagatan a paset ti probinsia a mangserbi iti ili ti Badoc, Pinili ken Currimao.
