LAOAG CITY – Nauram ti pasdek a pagaramidan ti cornick iti Barangay Salbang iti ili ti Paoay.
Segun ken ni Clairol Cacayorin, agtagikua ti nasao a pasdek, possible a ti nabatbati a beggang nga adda iti kerraang a paglulutuan da ti nangitunda ti uram.
Kuna na a nakadisso ti maysa a silyasi a naglaon iti mantika iti asideg ti kerraang ken adda nakabitin a tolda iti asideg na.
Inbatad na a daytoy ti patien na a nangitunda ti alisto a idadakkel ti apoy.
Naamoan nga umabot ti 200,000 a pisos ti balor dagiti nadadael pakairaman ti pimmutok a tangke ti LPG, mantika, dagiti kayo nga us-usaren da a pagluto iti cornick ken ti mismo a pasdek.
Immunan nga inbatad ni Cacayorin a dagus a nagresponde dagiti kameng ti BFP Paoay ngem alisto ti panagkayamkam ti apoy.
