LAOAG CITY – Inyangaw ni Vice President Sara Duterte iti saludsod dagiti kameng ti Media no ayanno ti mabirbirok a ni Pastor Apollo Quiboloy a lider ken founder ti Kingdom of Jesus Christ (KOJC).
Kunana nga addan iti tangatang ni Pastor Quiboloy kagiddan iti panagisemna.
Inusarna pay ti imana iti panangiladawan ken ni Quiboloy ken kimmita iti tangatang idi sinungbatanna ti saludsod.
Idi Domingo, nakikaysa ni Duterte kadagiti miembro ti Kingdom of Jesus Christ kalpasan ti panangselebrar ti grupo iti maika-39 nga anibersario.
Immunan a kinondenarna ti inaramid a panangserrek dagiti pulis iti Kingdom of Jesus Christ Compound idiay Davao City ken kunana a ti mapaspasamak nga standoff iti nagbaetan dagiti pulis ken dagiti sumupsuporta ken ni Quiboloy ket maysa a krisis ken disaster.
Maipalagip a sinerrek dagiti dua a ribu a pulis ti compound idi Agosto 24 tapno iserbi ti warrant of arrest nga inparuk-at ti Regional Trial Courts (RTCs) ti Davao City ken ti Pasig City gapu kadagiti sangsangoenna a kaso nga human trafficking, child ken sexual abuse kontra iti Pastor.
