LAOAG CITY – Inpetteng ni Batangas 2nd District Rep. Gerville Luistro ti “empty chair” wenno bakante a tugaw kas simbolo ti saan a panagatendar ni Vice President Sara Duterte iti impeachment proceedings.
Iti kaudian a panagdengngeg iti House Committee on Justice, inbatad ni Luistro nga iti baet dagiti ebidensya ken diskusyon, nagtalinaed nga awan ti direkta a sungbat wenno palawag manipod iti bise presidente.
Segun kenkuana, maipagarop a nabayagen nga inuray ti komite ti personal nga isasango ni Duterte iti babaen ti panagsapata na ngem awan ti nagbalin a sungbat na.
Innayon ti agpanpanday linteg nga immaboten ti komite iti punto nga umdasen dagiti ebidensya tapno ituloy ti proseso ,isut gapuna a saanen a kasapulan nga iyalud-od pay ti panagdengngeg.
Maipalagip nga idi Abril 29 ita a tawen, indeklarar ti komite nga adda ti probable cause, a nagbalin a pagibasaran tapno isagana ti impeachment articles para iti plenaryo ti panangtratar.
