LAOAG CITY – Inpasigurado ti Malacañang a kangrunaan a prioridad ni Presidente Ferdinand Marcos Jr. ti panangprotekta iti interes ti pagilian kagiddan ti panangballaag ni dati a Supreme Court Associate Justice Antonio Carpio a mabalin a patarak laeng ti joint exploration idiay China.
Inbatad ni Press Officer Undersecretary Claire Castro, saan nga isakripisio ti Presidente ti kasasaad ti Pilipinas iti aniaman a katulagan.
Inlawlawagna a nadakamat laeng ti Presidente ti posibilidad ti joint exploration kalpasan a nasaludsod isuna iti maysa nga interview ti foreign media no nakalukat ti administrasion iti kastoy a klase ti kooperasion.
Kunana nga iti aniaman nga addang ti gobierno ket dumalan iti naiget a panagadal tapno maipasigurado a maprotprotektaran ti interes ti pagilian ken dagiti umili.
Iti agdama, awan pay ti baro a detalye mainaig iti joint exploration ti Pilipinas ken China.
