LAOAG CITY – Nagpanawagan ni Mr. Marcel Tabije, ti mangidadaulo iti Provincial Disaster Risk Reduction and Management Council ditoy probinsya iti kooperasyon ti publiko ita nga Undas.
Inbatad na a masapol koma a sumurot amin kadagiti pagannurutan tapno mapagtalinaed ti linak, urnus ken talna para iti Oplan Kaluluwa 2025.
Inbalakad na a saan koman a gandaten dagiti umili ti agitugot kadagiti maipawil a banag iti kamposanto, karaman ditoyen dagiti arak, patadem, dagiti napipigsa a panagpatukar babaen ti panagusar ti speaker iti kamposanto ken dadduma pay.
Innayon ni Tabije a masapol nga amwen dagiti umili dagiti emergency desk tapno ammo ti pagturturungan ken pagkiddawan ti tulong no kasapulan.
Mainaig iti daytoy, nagpalagip met ni Tabije kadagiti nagannak a no mabalin ket saanen nga itugot dagiti babassit nga annak ken dagiti taraken iti panagturong iti kamposanto.
Kuna na pay a masapol a siguradwen dagiti agturong iti kamposanto nga adda ti itugot da a danom tapno maliklikan ti possible a pannaka-dehydrate aglalo ket nabara ti panawen.
