LAOAG CITY – Inpasigurado ti Social Security System (SSS) a nagtalined a natalged ken natibker ti pundo para iti pension dagiti miembro daytoy pakairamanan dagiti sumaruno nga henerasion.
Daytoy ket kalpasan a nairekord ti ahensia ti naisangsangayan a panaglabes iti P1 trillion mark ti reserve funds-da idi 2025.
Iti report ni Finance Secretary ken Social Security Commission (SSC) Chair Frederick Go, umabot iti P142.97 billion ti net income ti Social Security System iti napalabas a tawen, nangatngato ti 58.4% maidasig iti datos idi 2024.
Ngimmato ti pakabuklan nga assets ti ahensia iti P1.26 trillion a maibilang a record-breaking financial performance.
Inbatad ni Go, ti natibker a pundo ket garantiya a kabaelanna a supusupan ti benepisio dagiti pensionado iti naunday a panawen.
Daytoy ket kagiddan ti pammilin ni Presidente Ferdinand Marcos Jr., usaren ti natibker a pinansial a posision ti Social Security System tapno masigurado ti agtultuloy a serbisio pakairamanan ti alisto a proseso iti Micro Loan ken Calamity Loan para kadagiti miembro nga agkasapulan.
