LAOAG CITY – Kinumpirmaran ti Bureau of Animal Industry a nakairekord ti pagilian iti umuna a kaso ti Q Fever.
Maapektaran ti tao ti nasao a sakit a naipagagangay a makaapektar kadagiti baka, karnero ken kalding no malang-ab ti kontaminado a tapok.
Makarikna dagiti indibidual a maapektaran iti nasao a sakit iti panaglammin, gurigor, muscle pain, ken no mabaybay-an ket possible a maaddaan ti komplikasyon iti dalem wenno puso.
Mainaig iti daytoy, inpakaammo ni Dr. Christian Daquigan, ti officer-in-charge ti National Veterinary Quarantine Services Division ti Bureau of Animal Industry a kaaduan kadagiti kalding a nagpositibo iti sakit ket manipud iti Santa Cruz, Marinduque.
Innayonna nga awan pay ti kumpirmado nga human case iti lokal.
Kabayatanna, inrakurak ti Department of Agriculture a temporaryo nga iparitda ti panagangkat kadagiti kalding manipud idiay Amerika.
Inlawlawag ti National Institutes of Health (NIH) a ti Q fever ket sakit nga itunda ti bacterial pathogen Coxiella burnetii.
