LAOAG CITY -Inistorya ni Bombo International News Correspondent Kelly Abagat, maysa nga estudyante ken Covid Survivor ken agdama nga adda idiay Berlin, Germany no kasano na a nalaban ti nasao a virus.
Segun kenni Abagat, uray narigat para kenkuana gapo ta adda ditoy Pilipinas ti pamilya na ket maragsakan gapo ta nalabanan na ti nasao a sakit.
Inbatad na a ti ummuna a narikna na ket naggurigor rason a nagpatest ken kalpasan ti tallo nga aldaw ket inpakaamo ti doktor a positibo isuna.
Kunana a nakaluwa idi naamoan na daytoy gapo ta saan na a ninamnama a makaptan ti virus, ken inpalawag ti doktor dagiti saan na a mabalin nga aramiden kas iti panagtalinaed na iti apartment na.
Naamoan a mild laeng ti sinagaba na rason a saan a masapol a ma-admit iti ospital ken naibalakad kenkuana a no marigatan nga aganges ket dagus a tumawag ti ambulansya, ken kalpasan na ket inpakammo na iti pamilya na dito Pilipinas.
Kunana nga uray nagpanic ti pamilya na ket ginutigot da isuna nga agpapigsa ti immune system ken suruten dagiti amin a protocol.
Naamoan nga uray adda iti apartment na ket inaldaw a tawagan isuda dagiti doktor ken dadduma pay a health officers tapno mamonitor ti sitwasyon na.
Nupay kasta, maragsakan gapo ta nalasatan na ti sakit uray adda ti gundaway a saan unay a makaturog iti rabii gapo ta marigatan nga aganges.
Patyen ni Abagat a naala na ti virus idi napan da idiay Belgium kadwa na dagiti kaklase na.
Mainaig iti daytoy, kuna ni Abagat a tinulungan isuna ti Filipino Community iti nasao a pagilyan a nangted ti makan ken ti embahada ti Pilipinas.
Kabayatanna, napalaos ti panagyaman na kadagiti frontliners kangrunaan na dagiti doktor a nang-asikaso kenkuana.
