LAOAG CITY – Sumango ti agsusukot a reklamo dagiti pito a lallaki gapu iti panangiyuswat da ti motor cross da iti Barangay Parang iti ili ti Badoc.
Nabigbig dagitoy nga isuda Leonel Raña y Baldos, agtawen ti 20, mannalon, taga Barbar, Pinili; Clifford Mexia, agtawen ti 20, taga Ar-arusip, Badoc; Rexie John Aurellano, agtawen ti 21, taga Barbar, Pinili; Jayford John Fernandez, agtawen ti 20, Ace Baldugo, agtawen ti 20, Jhon Mark Balboa y Agustin, agtawen ti 26, agpapada dagitoy a taga Barangay Parang iti ili ti Badoc, ken ti agtawen ti 16 a taga Brgy. Ar-arusip, Badoc.
Segun ken ni Police Capt. Joseph Tayaban, ti chief of police iti ili ti Badoc, mismo a ni Barangay chairman Bryan Joshua Fernandez iti Barangay Parang ti nagreport kadakuada mainaig iti ar-aramiden dagiti suspek.
Inlawlawag na a basar ken ni Kapitan Fernandez, kinasarita na dagiti maseknan nga isardeng da ti panagmotor cross da ngem saan da nga inkaso isut gapuna a nagreport daytoy iti kwerpo ti pulisya.
Kuna pay ni Tayaban nga iti imbestigasyon ket umab-abot iti 30 agingga iti 40 a tattao ti napan nagbuya.
Nupay kasta, iti papanda panagresponde ket nagtalapwagan a dagus dagiti agbuybuya ti motor cross.
Gapu iti daytoy, possible a sumango dagiti suspek ti panaglabsing ti Article 151 ti RPC wenno Resistance and Disobidience to person in Authority, RA 11469 wenno Bayanihan to Heal as one Act, panaglabsing ti Executive Order (EO) No 67-20 wenno ti panagusar ti face mask ken ti panaglabsing ti Municipal traffic Ordinance.
Iti agdama, nagtalinaed dagiti suspek iti kustodyar ti PNP iti ili ti Badoc karaman dagiti inusar da a motorsiklo.
