LAOAG CITY – Inpetteng ni Israeli Prime Minister Benjamin Netanyahu ti panangrautda idiay Doha, Qatar a target dagiti nangangato nga opisial ti Hamas idi Septiembre 9.
Iti maysa a press conference, inbatad ni Netanyahu a ti nagbalin a tignayda ket “justified.”
Inlawlawagna a konektado ti Qatar iti Hamas no sadinno a pappapigsaen, tultulungan ken maipagarup a punpundoan ti Qatar ti grupo.
Kunana nga adda ti kabaelan ti Qatar nga agsanud ngem saanda nga inaramid.
Maipalagip a nagresulta ti panagbomba ti Israel idiay Doha ti pannakatay ti innem nga indibidual ngem awan ti nairaman ditoy a nangangato nga opisial ti Hamas nga isu ti target ti Israel.
Kabayatanna, kas sungbat ket nangiwayat ti Qatar ti emergency summit ti Arab League and Organization of Islamic Cooperation nga inatendaran dagiti lider ti agarup 60 a pagilian tapno ipanawagan ti naiget a tignay kontra iti Israel.
