LAOAG CITY – Inbilin ti Philippine National Police (PNP) ti amin a police units iti intero a pagilian a makikooperar iti Department of Education (DepEd) iti pannakaisayangkat ti active shooter drills kadagiti pampubliko ken pribado a pagadalan kas paset ti panagpapigsa iti seguridad mainaig iti nakaam-ames a pammaltog iti uneg ti San Jose National High school iti Tacloban City.
Segun ken ni Philippine National Police (PNP) chief PGen. Jose Melencio Nartatez Jr., nabilin dagiti local police commander a makitinnulong iti Department of Education ken school administrators tapno masigurado ti pannakipaset ken presensia ti pulisia iti kangitingitan ti nadakamat a panagsanay.
Kunana a gagem ti drills a mangipaay ti praktikal nga adal kadagiti estudiante ken mangisuro no kasano nga agresponde no adda man ti armado a panangraot iti uneg ti pagadalan.
Immunan nga inrakurak ni Education Secretary Sonny Angara a maisayangkat ti nadakamat a panagsanay ti standard protocols kadagiti pagadalan no sadinno isu ti suroten no adda ti mapasamak a pammaltog tapno insigida a makaresponde dagiti opisial ti pagadalan ken maprotektaran dagiti estudiante ken staff.
