LAOAG CITY – Ni laeng Vice President Sara Duterte ken dagiti opisyales a direkta a nangasikaso iti P112.5 million confidential funds ti Department of Education (DepEd) ti addaan iti personal a pannakaammo no kasano a naaramat ti pondo, segun iti testimonia ni dati a DepEd Undersecretary Michael Poa.
Iti panagtultuloy ti impeachment trial, kinuna ni Poa nga awan ti personal a pannakaammona iti aktual a pannakagastos dagiti confidential funds uray isu ti naipatugaw a mangsungbat iti Audit Observation Memorandum (AOM) ti Commission on Audit (COA).
Binigbig ni Poa da Duterte ken dati a DepEd Special Disbursing Officer Edward Fajarda a tattao nga addaan pannakaammo iti pannakaaramat ti pondo.
Pinaneknekan pay ni Poa nga impakaammona ken ni Duterte idi maawat ti AOM ken nagkiddaw iti pammalubos a makiuman ken ni Fajarda tapno maisagana ti sungbat ti DepEd iti COA.
Segun kenni Poa, impakaammona pay ken ni Duterte ti linaon ti sungbatda ken inikkanna daytoy iti soft copy iti maysa nga aldaw sakbay nga insubmitirna iti COA.
Iti sidong ti panagsaludsod ti prosekusion, pinasingkedan met ni Poa nga awan ti personal a pannakaammona no ti impormasion a nagatang kano babaen ti kompidensial a pondo ket talaga a nangiturong iti naballigi nga operasion ti intelligence.
