LAOAG CITY – Inlawlawag ni Atty. Nikki Pilar, Chief of Staff ti Ilocos Norte Electric Cooperative wenno INEC a saan a poste ti Ilocos Norte Electric Cooperative ti poste a matumtumba iti paset ti national highway iti Barangay Corocor iti ili ti Bacarra.
Segun kenkuana, daytoy ket kas maibasar iti kumpirmasion ni Mr. Perry Martinez, Acting General Manager iti nasao a kooperatiba.
Basar iti panagturong ti Bombo Radyo Laoag News Team iti nasao a lugar ket naduktalan a daytoy a poste ket kukua ti maysa a telecommunications company.
Kalikagum dagiti residente nga insigida a maiplastar ti matumtumba a poste gapu ta narisgo para kadagiti dumaldalyasat a motorista.
Kabayatanna, rumrummuar a posible a ti nangitunda ti in-inot a pannakatumba ti poste ket gapu iti agtultuloy a mapaspasaran a panagtudtudona.
