LAOAG CITY – Inbatad ni Atty. Neri Javier Colmenares – Presidential Adviser on Human Rights ti Integrated Bar of the Philippines (IBP) a dakkel ti epekto ti nagbalin a rebelasyon ti dati a Philippine Charity Sweepstakes Office (PCSO) General Manager ken retired P/Col. Royina Garma seknan iti war on drugs ken ni dati a Presidente Rodrigo Duterte.
Segun ken Colmenares a no umabot daytoy iti International Criminal Court (ICC) ket mabalin a mangiwayat ti korte ti warrant of arrest.
Daytoy ket mainaig ti maipagarop a panangimandar ni dati a Presidente Duterte ti panangidiaya ti gunguna para iti drug war killings ti administrasyon na iti pagilian.
Patien pay ni Colmenares a saan nga ar-aramid laeng ni Garma dagiti inbutaktakna gapu ta adda pay sangsangwen na a kaso iti Philippine Charity Sweepstakes Office.
Kunana a credible dagiti inbutaktak ni Garma ken adda posibilidad nga adu pay dagiti iruar nga impormasyon ni Garma.
Mainaig iti daytoy, mangnamnama ni Colmenares nga agsao metten ni National Police Commission commissioner ni Edilberto Leonardo seknan iti daytoy nga isyu.
Inpettengna nga imposible a ni Leonardo ti nagimandar iti extra judicial killings no di ket adda tao iti likudanna a nangmandar kenkuana.
Kabayatanna, inbatad ni Colmenares ti panangipatungpal idi ni Duterte iti war on drugs ket saan laeng a mainaig iti panangpaksiat iti illegal a droga iti pagilyan no di ket adda pay pakainaigan na iti pulitika.
