LAOAG CITY – Adda iti agdama idiay Middle East da Duke ken Duchess of Sussex para iti umuna nga international trip da iti uneg ti 18 a bolan.
Agtalinaed da Prince Harry ken Meghan idiay Jordan iti uneg ti dua nga aldaw tapno ipakita ti suporta da kadagiti vulnerable communities a naapektaran ti riribok ken naibakwit.
Maipalagip a dagiti agasawa ket bimmaba kas working royals idi 2020.
Nagbiyahe da idiay Amman kalpasan ti imbitasyon kadakuada ni Dr. Tedros Adhanom Ghebreyesus, ti director-general ti World Health Organization (WHO).
Ti panagbisita dagiti agasawa iti Jordan ket iti panawen ti krisis para iti Royal Family kalpasan ti pannakaarestar ti uliteg ni Harry a ni Andrew Mountbatten-Windsor, gapu iti maipagarop a saan a maiparbeng wenno nainkalintegan nga inaramid na iti public office.
