LAOAG CITY – Dakkel a tulong ti pannakabuangay ti Project Monitoring Council tapno makasingir ti usto kadagiti quarry permittee ditoy probinsya.
Segun kenni Board member Hanson Chua, chairman ti Committee on Ways and Means, ti maysa kadagiti kangrunaan a pamastrekan ti probinsia ket ti panagquarry.
Inlawlawag na a babaen ti nasao a grupo a mangkita ken mangmonitor kadagiti proyekto ti gobierno a maiyimplementar ket maamwan ti usto a kaado ti masingir.
Immuna iti daytoy, inamendaran ti Sang Panlalawigan ti quarry ordinance no sadinno a maysa kadagiti nainayon a probisyon ket ti advance payment manipod kadagiti contractor nga agala ti aggregates base iti program of works iti Department of Public Works and Highways para kadagiti government projects.
Daytoy ket tapnu dakdakkel ti mapastrek ti probinsia iti kada tawen a kas iti probinsia ti Pangasinan a dati ket 12-milyon a pisos ngem nagbalin a 200 a milyon a pisos .
Mainaig iti daytoy, inlawlawag met ni Chua a karaman koma ti Project Monitoring Council iti quarry ordinance ngem masapol nga agsina tapnu sabali pay a public hearing ti maisayangkat.
