LAOAG CITY – Inbatad ti prosekusyon nga agbalin a kaatiddogan a maipresentar ti maipagarop a misuse ti confidential funds ni Vice President Sara Duterte manipod iti uppat nga articles of impeachment.
Daytoy ket gapu ta dua nga opisina ti maipagarop a sakopen na, ti Department of Education, a dati nga indaulwan ni Duterte ket ni Office of the Vice President.
Segun iti prosekusyon, ti Article I ket nakatutuk iti ₱612.5 milyon a confidential funds a naggapo iti Office of the Vice President (₱500 milyon) ken Department of Education (₱112.5 milyon) no sadinno a ti bise presidente ti dati a sekretaryo iti nasao a departamento.
Gapu iti money trail a nakairamanan ti dua nga ahensya, umabot daytoy iti saan a nababbaba ngem 31 nga aldaw ti pakabuklan ti 62 nga aldaw a panangusig, katukad ti agarop kaguda ti inlatang da a panawen para iti amin a reklamo.
Segun ken ni House prosecution legal spokesperson Benjamin Tolosa Jr., ado dagiti dokumento a karaman kasta met dagiti testigo a kasapulan a mangngegan ti palawag da iti sibubukel a proseso no kasanu a nagastos dagiti pondo agingga iti liquidation nga insumitir iti Commission on Audit (COA).
Nupay kasta, inrakurak met laeng ti prosekusyon nga ipadas da nga iyababa ti presentasyon iti babaen ti panangikkat kadagiti testigo iti kanito a mapaneknekan ti napapateg a punto, kas ti inaramid da iti grave threats articles, no sadinno nga adda ti innem a testigo nga inikkat da.
Inbatad met ni House prosecutor Rep. Terry Ridon, mabalinen a rugyan ti prosekusyon ti mangipresentar ti confidential funds intono Miyerkules, iti kanito a makumpleton ti direct ken cross examination ken ni National Bureau of Investigation Director Melvin Matibag intono Martes.
