LAOAG CITY – Kinumpirmaran ni Barangay Chairman Elviro Agoo iti Barangay Davila iti ili ti Pasuquin nga adda ti maysa a kabarangayan da a nagawid manipod iti Pampanga a naglugan ti trucking babaen ti panagpammarang na kas pahinante gapu ta pimmusay ti ama na.
Inbatad na a napan na met inreport a dagus daytoy iti Rural Health Unit (RHU) ken simmaruno iti Municipal Disaster Risk Reduction and Management Office (MDRRMO).
Iti agdama, naka-isolate ti maseknan iti nasao a barangay ken agquarantine iti 14 nga aldaw.
Inbaga na a maikonsiderar met a Person Under Monitoring (PUM) amin a kabbalay ti maseknan ken ti minatay da ket maitabonen intono bigat.
Inpakaammo ni Agoo a ti sumaruno maaramid ket amwen ti PNP ken MDRRMO no ania ti nagluganan ti kalugaran da tapno saanen a maulit ti napasamak.
Innayon ni Agoo a ti maseknan ket simmangpet laeng idi kalman ken nagdessaag iti ili ti Bacarra nga isu ti napan nangsabatan dagiti kabbalay na.
Kuna pay ti kapitan a ti inaramid dagiti kabbalay ti maseknan ket dinilnakan da laeng ti napudot a danom dagiti arwaten na ken pinagdigus da daytoy.
Kabayatanna, mamati ni Agoo a no adda man ti makailibas nga uminom ti arak iti barangay da ket dakkel ti posibilidad na a saan da a nagatang iti mismo a barangay wenno ili da.
Atapen na a no iti aldaw ket umay ditoy ciudad ti Laoag dagiti kabarangayan na tapno isu ti paggatangan da ti arak.
