LAOAG CITY – Inburay ni Kapamilya television personality Robi Domingo ti panagbisitna iti opisina ti National Bureau of Investigation (NBI) tapno talantanen no kasano nga agipila ti reklamo mainaig iti online threat.
Iti online page-na, inyestoria ni Robi ti panagsaritada ken ni Atty. Jerome Bomediano, Chief ti NBI-Organized and Transnational Crime Division (NBI-OTCD) ken ni Atty. Tucay.
Nagyaman ti host kadagiti sungbatda seknan iti proseso ti panagsubmitir ti reklamo.
Lineppas ni Robi ti post-na iti maysa a mensahe a mangal-allukoy iti amin nga agbalin a responsible iti online.
Ti panagbisita ni Robi iti National Bureau of Investigation ket kageddan ti online threat a naawatna manipud iti maysa a troll account mainaig iti dandanin a show daytoy a maysa isuna kadagiti host.
Naammoan a ti nasao a komento ket na-delete no sadinno a nagpangta ken ni Robi seknan kadagiti celebrity judges ti show nga isuda Donny Pangilinan ken Kathryn Bernardo a naglaon ti saan a napipintas a komento.
