LAOAG CITY – Inpetteng ti House prosecution panel a saan da a kasapulan ti agbalin a neutral iti impeachment trial ni Vice President Sara Duterte, kalpasan a dinillaw ni Sen. Robin Padilla nga arigna “one-sided” ti aramid ti prosekusyon iti panagdengngeg.
Segun ken ni lead prosecutor ken Batangas Rep. Gerville “Jinky Bitrics” Luistro, naipagagangay nga “adversarial” ti impeachment trial no sadinno nga obligasyon ti prosekusyon a paneknekan dagiti akusasyon iti babaen ti ebidensya, idinto a responsibilidad met ti depensa nga ikalintegan ti respondent.
Kunana nga agbalin a nakakas-kasdaaw no agbalin a neutral ti prosekusyon wenno isuda pay ti mangikalintegan iti maak-akusaran.
Inpetteng pay ni Luistro a ti panagbalin a patas ken awan ti kankanunungan na ket namnamaen senator-judges, gapu ta isuda ti agdesisyon basar kadagiti ebidensya nga idatag ti agsumbangir a partido.
