LAOAG CITY – Iyur-uray pay laeng ti Samahang Basketbol ng Pilipinas (SBP) ti pammilin manipud iti FIBA kalpasan a nakaawat ti ‘notice of adverse analytical finding’ ni Gilas Pilipinas naturalized player Justin Brownlee.
Immunan nga inpadamag ti Samahang Basketbol ng Pilipinas a naminsan manen a nagpositibo ni Brownlee iti maipawil a substance a masansan daytoy a masarakan kadagiti ‘recreational’ drugs.
Basar iti Samahang Basketbol ng Pilipinas nga iyur-urnusen ti abugado ti Brownlee manipud idiay Estados Unidos ti nasao a kaso.
Inlawlawag ti Samahang Basketbol ng Pilipinas nga awan pay ti nairuar nga official ruling ti FIBA agingga iti agdama.
Naammoan a ti nasao a “notice of an adverse analytical finding” ket adda ti pakainaiganna iti doping violation ngem saanen nga inbuksilan pay ti Samahang Basketbol ng Pilipinas no kaano a rimmuar ti resulta.
Naudi a nagay-ayam ni Brownlee iti international campaign ket idi FIBA Asia Cup 2025 qualifiers idi Pebrero no sadinno a nakalabanda ti Chinese Taipei ken ti New Zealand.
