LAOAG CITY – Bwineltaan ni Senador Robinhood Padilla kontra kadagiti kritiko a nagbabalaw kenkuana mainaig iti panangipaay ti depinision iti “force majeure.”
Iti Facebook post ti Senador, inbatadna a naidumduma ti panangikalintegan dagiti genius ken highest level ti panagpilosopo.
Kunana nga iti kalsada lattan ti pagsaludsodan dagiti kritiko no ni Senador Bato dela Rosa ket iranrantana kadi a saanna kayat ti agtrabaho wenno saan a palpalubosan a makatrabaho gapu ta ibalud iti sabali a pagilian.
Immunan nga inpetteng ni Padilla a palubosan nga agatendar iti sesyon ni Dela Rosa iti babaen ti teleconference wenno videoconference gapu ta maibilang met a “force majeure” a dinakamatna isut gapuna tapno palubosan ti kaduana a Senador.
Inpetteng ni Padilla a “force majeure” ti panangiladawan iti Middle East war, China-Taiwan conflict pakairamanan ti El Niño phenomenon.
Nupay kasta, nakailanad iti rules ti Senado a palubosan laeng dagiti Senador iti virtual attendance no ti saan a ninamnama a pasamak wenno force majeure ket pudno a makalapped kadakuada tapno pisikal nga agatendar iti sesyon ken dagiti panagdengngeg.
