LAOAG CITY – Nagdesisyon ti Sandiganbayan a saan a makipartisipar ni dati nga Ako Bicol Party-list Representative Zaldy Co iti court proceedings wenno makapagkiddaw ti aniaman a judicial relief agingga a saan a sumuko.
Iti 16 a pinanid ti resolusyon, pinatgan ti Sandiganbayan Sixth Division ti manifestation ti prosekusyon nga ideklarar ni Co kas pugante manipod iti hustisya.
Maipalagip a pimmanaw ni Co ditoy Pilipinas idi 2025 para iti medical reasons, ngem agpapan ita ket saan pay a nagsubli kalpasan ti pannakaipila ti kaso a malversation ken graft gapu iti maipagarop a substandard ti P289-million road dike project idiay Naujan, Oriental Mindoro.
Immunan nga indeklarar ti anti-graft court ni Co a “fugitive from justice” ken inbilin na ti pannaka-kanselar ti Philippine passports ti dati nga agpanpanday linteg.
Iti mosyon, inkalintegan ti prosekusyon a ti desisyon ti Korte Suprema a mangipawpawil kadagiti pugante nga agkiddaw ti judicial relief ket maiyaplikar ken ni Co.
Inkalintegan met dagiti abogado ni Co a saan pay a nakunviktaran ti kliyente da ken pimmanaw ditoy pagilian sakbay a naipila dagiti reklamo kontra kenkuana.
Nupay kasta, inpetteng ti Sandiganbayan a panawenen tapno maiyaplikar ti mandato kadagiti indibidual a nakaaramid wenno mapagatapan a nakaaramid ti krimen a nagturong iti saanen a hurisdiksyon ti pagilian.
