LAOAG CITY – Saan nga umanamong ti Sangguniang Bayan iti ili ti Bangui a maibusbos amin iti pannakaaramid ti farm to market road ti pundo manipud iti Republic Act 7171 wenno ti Tobacco Excise Tax.
Segun ken ni Vice Mayor Denton Garvida iti nasao nga ili, nailanad iti proposed budget nga isu ti pakaikabilan dagiti dadakkel a porsiento ti 25 a milyon a pisos a pundo ti nasao a buis ken bassit ti mailatang para kadagiti farm inputs.
Inbatadna a no maipanggep kadagiti dalan ket adda met dagiti national agencies a mabalin a pagkiddawan dagiti lokal a gobierno tapno maiyestablisar dagitoy.
Inlawlawagna a nasaysayaat no maiturong ti maaw-awatda a pundo manipud iti Tobacco Excise Tax kadagiti farm inputs tapno ad-adda a matulungan dagiti mannalon.
Innayonna nga iti agdama ket manarimaan pay laeng ti pannakatratar ti Annual Budget iti ili ti Bangui para iti 2025.
