LAOAG CITY – Naglikudan ni Sen. Christopher “Bong” Go ti pannakairamanna iti “war on drugs” ni dati a Presidente Rodrigo Duterte.
Inbatad ni Go nga awan ti pangibasaran kadagiti pammabalaw, adda ti kankanunungan ken saan a patas.
Inlawlawagna nga awan ti pakainaiganna ti akem ken responsibilidadna iti war on drugs idi adda pay laeng isuna iti serbisio kas Special Assistant to the President manipud idi Hunio 2016 agingga iti Oktubre 2018 ken kas Executive Assistant to the Mayor ti Davao City manipud idi 1998 agingga iti 2016.
Nainaganan ni Go a maipagarup kas “co-perpetrator” wenno kakunsabo ni Duterte iti nadara a war on drugs basar kadagiti dokumento nga inparuk-at ti International Criminal Court Prosecution panel.
Naammoan a dagiti dadduma pay a nainaganan ket isuda Sen. Ronald “Bato” Dela Rosa, dati a Philippine National Police chief; dati a Justice Secretary Vitaliano Aguirre II ken dati nga hepe ti Philippine National Police a ni Oscar Albayalde.
Immunan a naglikudan ni Go a nagusar ti napalabas nga administrasion ti “reward system” iti drug war daytoy ngem kunana nga awan ti pakainaiganna iti kontrobersial nga anti-narcotics campaign.
