LAOAG CITY – Innaganan ti International Criminal Court (ICC) da Senador Ronald “Bato” dela Rosa ken Senador Christopher Lawrence “Bong” Go kas co-perpetrators iti kaso nga adda ti pakainaiganna iti kampania kontra iti droga ni dati a Presidente Rodrigo Duterte.
Basar iti naiparuk-at a Document Containing the Charges (DCC), dinakamat ni Duterte kas indirect co-perpetrator iti babaen ti Article 25 (3)(a) ti Rome Statute para kadagiti krimen partikular iti murder ken attempted murder.
Nakailanad iti dokumento a dagiti panagpapatay ket napasamak manipud idi 2011 agingga iti 2019 pakairamanan dagiti insidente idiay Davao City a maikonkonektar iti Davao Death Squad ken dagiti operasion iti babaen ti “war on drugs” idi panawen ti administrasion Duterte.
Basar iti International Criminal Court, ti pannakairaman da dela Rosa ken Go iti listaan ket gapu iti papelda iti pannakaipatungpal ken panangsuporta kadagiti pagannurotan ti drug war.
Karaman kadagiti nadakamat nga opisial dagiti sumagmamano a dati a miembro ti gabinete ken law enforcement agencies nga addaan ti direkta a pakainaigan iti operasion.
Mainaig iti daytoy, dagiti dinakamat a nagan ti International Criminal Court ket dagiti sumaganad:
Ronald “Bato” Dela Rosa
Vicente Danao
Camilo Cascolan
Oscar Albayalde
Christopher Lawrence “Bong” Go
Dante Gierran
Isidto Lapeña
Vitaliano Aguirre II ken dadduma pay nga opisial ti Philippine National Police ken high-ranking government officials.
Iti agdama, naikeddeng nga adalen ti Pre-Trial Chamber dagiti ebidensia tapno maammoan no agpursige iti panangtingiting.
Inpaganetget ti International Criminal Court a ti pannakaiparuk-at ti dokumento ket paset ti transparency ken tapno ipakita ti sakupen ti panagsungbat iti naawagan a “war on drugs” ti Pilipinas.
Agtultuloy nga ur-urayen ti Bombo Radyo ti agbalin a sungbat ditoy dagiti nainaganan nga indibidual mainaig iti nasao a banag.
