LAOAG CITY – Ipilpilit ti administrasyon Marcos a maipatugaw ni Department of Justice Secretary Boying Remulla kas mangidaulo iti Ombudsman tapno maipabalod ni Vice President Sara Duterte ken dagiti kaalyado daytoy.
Daytoy ti inpetteng ni Presidential Sister ken Senator Imee Marcos a mabigbig a kaalyado ti pamilya Duterte.
Segun kenni Marcos, nalawag ti addang kontra kenni Duterte gapo iti agsasaruno a maipagarop a plano tapno maikkat daytoy iti 2028 presidential race.
Inbatad na pay a dua pay a kaso ti nakapenpen kotra kenni Remulla ti agdama iti Ombudsman – administrative ken criminal cases, ngem aarig na ipilpilit dagitoy a maibasura tapno mawayaan ti appointment na.
Kunana pay a nalawag dagiti garaw tapno maiyalisto ti proseso, pakairamanan ti kellaat a pannakasukat kenni Deputy OIC Ombudsman Ma. Flor Punzalan-Castillo nga indiskribir na kas independent-minded.
Gapo it daytoy, kuna ni Marcos a kontraen na ti plano a panakadutok kenni Remulla iti Ombudsman kno sadinno mangipila isuna ti oppostion paper iti Judical and Bar Council.
Innayon na a saan a rumbeng a politiko ti madutukan iti Ombudsman gapo ta addaan ti conflict of interest malaksid pay iti dua a nakapenpen a kaso.
