LAOAG CITY – Inpetteng ni Senador Christopher “Bong” Go nga awan ti aniaman a partisipasyon na iti “war on drugs” ni dati a Presidente Rodrigo Duterte.
Daytoy ti inrakurakna kalpasan nga inakusaran isuna ni dati a Philippine Charity Sweepstakes Office (PCSO) General Manager Royina Garma nga isuna ti kadwa ni Duterte iti nationwide campaign kontra iti iligal a droga ken ti naipatungpal a reward system ti kampanya.
Kuna ni Go, kas dati nga Special Assistant to the President ni Duterte ket limitado laeng ti akem na no sadinno a sumagmamano laeng kadagitoy ket ti scheduling, appointments ken presidential engagements ti dati a Presidente.
Mainaig iti daytoy, inawagan met ni Philippine National Police (PNP) chief Police General Rommel Marbil a lawlawagan dagiti dati a hepe ti nailyan a pulisya ti pannakai-ramanda iti drug war ni dati a Presidente Rodrigo Duterte, kalpasan ti panangibutaktak ti retirado a police colonel Royina Garma nga adda payment and rewards system iti panangpapatayda kadagiti suspek iti ilegal a droga.
Iti affidavit-na, kinuna ni Garma a karaman da Senador Christopher “Bong” Go ken ti dati a National Police Commission commissioner a ni Edilberto Leonardo iti kampania.
Kabayatanna, pinasingkedan met ni human rights lawyer Chel Diokno a nasurok a 20,000 a tattao ti natay iti drug war basar iti 2017 year-end accomplishment report ti administrasion ni Duterte.
