LAOAG CITY – Atapen ni Senador Imee Marcos nga aggapo a mismo iti uneg ti maipagarop a destabilization plot kontra iti liderato ti kabsat na a ni Presidente Ferdinand “Bongbong” Marcos Jr.
Inbatad ni Senador Imee a napagsaritaan dan iti kabsat na ti maipanggep iti maipagarop a plano a riribok ti gobyerno, ngem arigna saan a mamati ti presidente.
Kuna ti senadora a masayangan no bilang maaddaan ti susik iti koalisyon ti administrasyon gapu ta makita iti kinaurnus ti ‘UniTeam’, awan ti panagririri ken natured dagiti Duterte isut gapuna nga awan ti rason tapno riribuken ti agdama a gobierno.
Nabukel ti UniTeam iti tambalan da Presidente Marcos ken Vice president Sara Duterte iti panagtipon ti puwersa da idi 2022 elections.
Mainaig iti daytoy, inpakaammo ni Sen. Imee, a binalakadan na ti kabsat na ken nagballaag met kadagiti agplanplano ti dakes kontra iti administrasyon Marcos.
Inpetteng ni Senador Imee a nasingpet ti kabsat na a presidente ngem narigat no daytoy ti makapungtot isut gapuna nga agannad dagiti agplanplano a manglaban ti gobierno na.
Immunan a naglikudan ti Armed Forces of the Philippines (AFP) ken Philippine National Police (PNP) nga adda ti destabilization plots kontra iti administrasyon ni Presidente Marcos.
Naglikudan pay ni dati a Presidente Rodrigo Duterte, ama ni Vice President Sara, a nakitaripnong iti sumagmamano nga opisyal ti militar ken pulisya, pakairamanan dagiti pulitiko iti kangitingitan dagiti damag a destabilization plot.
