LAOAG CITY – Natay ti maysa a senior citizen kalpasan a maipagarup nga adda ti nangpang-or ti natangken a banag iti rupana iti nagbedngan iti Brgy. 2 ditoy siudad ti Laoag.
Nabigbig ti biktima a ni Domingo Ansagay Andres, agtawen iti 60, naasawaan ken residente ti Brgy. Caaoacan ditoy siudad ti Laoag.
Segun ken ni Luis Sison, agtartrabaho kas maysa a construction worker iti maipatpatakder a pagtaengan ti biktima, isuna mismo ti immuna a nakakita ti biktima a nakadasay iti saan a sementado a dalan.
Inbatadna a saanna a dagus a nalasin ti biktima gapu iti nakana a sugat a sinagabana iti rupana.
Mainaig iti daytoy, basar iti inisyal nga imbestigasion ti Laoag City Police Station a posible nga adda ti indibidual a nangpang-or iti biktima babaen iti natangken a banag.
Kabayatanna, iti panagturong ti News Team ti Bombo Radyo Laoag ket adda ti iggem ti biktima a landok a mabalin nga adda ti pakainaiganna iti napasamak nga insidente.
Iti agdama, agtultuloy ti maiwaywayat nga imbestigasion dagiti otoridad maipanggep iti nakaam-ames a pasamak.
