LAOAG CITY – Nagtrabaho ni Mrs. Ma. Victoria Bersamin, maysa a single mother iti ballasiw taaw tapno maisakadna dagiti annakna.
Daytoy a sakripisio ti maysa nga ina ket nasken laeng a maitag-ay kagiddan ti pannakaselebrar ti Mother’s Day ita nga aldaw.
Segun ken ni Victoria, agarup 10 a tawen a nagserbi daytoy kas dressmaker idiay Saudi Arabia para iti napinpintas a masakbayan dagiti dua nga annakna.
Inbatadna a saan a nagbalin a nalaka ti panagbalinna kas maysa a Single Mother ken maysa nga Overseas Filipino Worker.
Inlawlawagna a nasakit para kenkuana a saan a kumpleto ti bukudna a pamiliana ngem awan ti naaramidanna no diket panawanen ken makisinan iti misterna gapu iti paulit-ulit a panangdangdangran kenkuana.
Malaksid iti daytoy, kunana a narigat pay ti agbalin a maysa nga Overseas Filipino Worker gapu ta awan la ngaruden ti ama iti denna dagiti annakda ket awan pay isuna nga ina iti sibayda.
Nupay kasta, inpasingkedna a no ag-day off daytoy ket ibusbosna ti amin nga orasna kadagiti annakna babaen ti panag-video call dagitoy nga imbes a makipaset kadagiti aktibidad ti Filipino Community.
Innayonna nga amin nga ar-aramidenna ket para iti masakbayan ken pananggun-od ti arapaap dagiti annakna.
