LAOAG CITY – Manamnama a maestablisar ti Solar Project iti 190 nga ektaria a lote iti Barangay Bacsil ken Mumulaan iti ili ti Paoay.
Segun ken ni OPOS Solar project Representative Ann Canyosarios, ti nasao a proyekto ket 300 mega watts ken isuda ti mangipaay ti transmission line a mapan iti substation iti National Grid Corporation of the Philippines iti ili ti Pinili.
Inlawlawag ni Canyosarios a daytoy ket madalananna ti tallo nga ili pakairamanan ti Paoay, Currimao ken Pinili.
Inbatadna a maysa kadagiti benepisio ti nasao a proyekto ket mangallukoy kadagiti turista rason nga inpanda iti asideg ti 4×4 adventure tapno matantan-awan dagiti mangipadas ti nasao nga aktibidad.
Naammoan a malaksid pay ti turismo ket mabenepisiaran pay ti probinsia babaen ti real property tax, royalty tax, government share, local business tax ken pannakaempleyo dagiti umili bayat ti pannakaaramid ti nasao a proyekto.
Kabayatanna, kalikagum ti Sangguniang Panlalawigan a makita ti pakabuklan a plano ti kompania nangruna ket asideg daytoy iti baybay, banag a saan koma a mabalin.
Basar iti Sangguniang Panlalawigan, no adda ti sumangbay a bagyo ket amangan no maperdi laeng dagiti panel ngem no met iti patag ket adda met dagiti kayo a posible a maputol.
Gapu iti daytoy, gagem ti hunta probinsial nga adalen a nasayaat ti proyekto sakbayda nga aprobaran daytoy.
