LAOAG CITY – Maisayangkat ti State of the Province Address wenno SOPA ni Gob. Matthew Marcos Manotoc intono Lunes, Enero 10 ita a tawen.
Maipalagip a kadagiti naglabas a tawen ket saan a nakaipaay ti SOPA ti gobernador gapu iti pandemia a gubuay ti COVID-19.
Inlawlawag ni Mr. Gervy James Gumarit, ti mangidadaulo ti Communications and Media Office a masapul a maiyuswaten ti nasao nga aktibidad tapno maammoan dagiti umili ti kasasaad ti probinsia.
Imbatadna a rumbeng nga ipakaammo ti gobernador dagiti nagapoanan ti gobierno probinsial, no ania dagiti proyekto ken aktibidad a naisayangkat manipud idi tawen 2020 agingga ita ken no ania dagiti kalikagumna pay a maipatungpal.
Mainaig iti daytoy, inbunannag ni Gumarit a maisayangkat ti pre-SOPA conference intono Enero siete a pakaimbitaran dagiti mangidadaulo kadagiti nagduduma a departamento ti gobierno probinsial.
Segun kenkuana, ditoy nga ipakaammo dagiti maseknan dagiti nagapoanan ken dagiti ar-aramiden dagiti idauloanda nga opisina kangrunaanna iti benneg ti salun-at, agrikultura, “livelihood and employment, edukasyon ken turismo.
Impalgak ni Gumarit nga intono malem no lunes a maisayangkat ti SOPA ni Gob. Manotoc iti kapitolio probinsial.
Kunana a karaman kadagiti manamnama a mangngegan dagiti umili ket dagiti impatungpal ti gobierno probinsial iti benneg ti salun-at ita a panawen ti pandemia, iti benneg ti agrikultura iti pakaseknan ti African Swine Fever wenno ASF ken ti panagsursur ti gobernador a mangtultulong kadagiti agnegnegosio ken dagiti awan ti pagtrabahoanna.
Innayonna a gapu ta maysa ti edukasyon kadagiti kangrunaan a naapektaran iti pandemia ket karaman daytoy kadagiti kangrunaan a dakamaten ti gobernador iti SOPA na.
Kabayatanna, inpakaammo ni Gumarit nga agtultuloy ti panangkiddaw ni Gob. Manotoc ti pannakaipatungpal ti “face to face learning” kadagiti nagduduma a probinsia pakairamanan ditoy Ilocos Norte.
