LAOAG CITY – Nakasangpeten idiay Egypt dagiti sumagmamano a masakit ken nasugatan a Palestino manipud iti Gaza kalpasan a nalukatan ti Rafah border crossing.
Nangrugi a nairikep ti Rafah border crossing sipod idi Mayo 2024 kalpasan a naala ti puersa ti Israel iti paset ti Gaza.
Ti maminsan manen a panaglukat ket nasken a naipatungpal koma iti umuna a tukad ti plano a ceasefire ni United States President Donald Trump iti nagbaetan ti Israel ken Hamas a nangrugi idi Oktubre.
Nupay kasta, kinontra daytoy ti Israel agingga a naisubli ti bangkay ti naudi nga hostage ti Israel iti Gaza a napasamak iti napalabas a lawas.
Daytoy ket dakkel a nam-ay para kadagiti naruay a Palestino ngem nadismaya dagitoy gapu ta limitado laeng dagiti indibidual a makastrek ken saan a maipalubos a maiserrek dagiti taraon.
Naammoan a sumurok-kumurang 20 a ribu a masakit ken nasugatan a Palestino ti agur-uray a makatalaw iti Gaza para iti pannakataming dagitoy basar kadagiti lokal nga ospital ken World Health Organization (WHO).
Kabayatanna, basar kadagiti report ti Israeli a 50 a pasiente laeng a kuyugen ti maysa wenno dua a kabagianna ti mapalubosan a rummuar iti kada aldaw.
