LAOAG CITY – Naragsak nga inpakaammo ni Brgy. Chairman Jessie Cris Lagundino ti Brgy. Pancian iti ili ti Pagudpud a saan unay a narigatan dagiti motorista a dumalyasat iti Sitio Banquero iti nasao a barangay kabayatan iti iduduprak ti Super Typhoon Carina.
Segun kenkuana, nagbalin a nalawa ti pagdalyasatan dagiti motorista gapu ta awan ti napasamak a panagreggaay ti daga kagiddan ti napigsa a tudo.
Nupay kasta, inpasingkedna a 24/7 a naka-alerto ti Department of Public Works and Highways no bilang adda ti mapasamak a panagtennag dagiti batbato wenno panagreggaay ti daga a mabalin a makaabbeng kadagiti motorista.
Inlawlawagna nga iti daytoy a gundaway ket manmanon dagiti agtennag manipud iti ngato ti bantay nga isu ti kanayon a mapaspasamak tunggal makapasar ti panagtudtudo iti nadakamat a lugar.
Nupay kasta, inallukoy ni Kapitan Lagundino dagiti motorista a no saan unay a napateg ti gagemda ket saan pay laeng a dumalyasat iti nasao a kalsada nangruna no rabii tapno maliklikan ti desgrasia.
Innayonna a nakasaganada a barangay officials a tumulong kadagiti residente ken motorista nga agkasapulan ti tulong.
