LAOAG CITY – Agrekreklamo dagiti sumagmamano a pasiente iti Gov. Roque B. Ablan Sr. Memorial Hospital mainaig iti panangited ti numero ti ospital kadakuada.
Segun ken ni Mr. Faustino Salmasan Jr., maysa kadagiti pasiente ti Outpatient Department iti nasao nga ospital, daytoy ket kalpasan a saan a masursurot no asino ti nasken nga umun-una a maakomodar a pasiente.
Inbatadna nga adda dagiti gundaway nga agsisinnungbatda a pasiente gapu iti saan a maawatan a pagannurotan ti ospital maipanggep iti numero a naited kadakuada.
Inlawlawagna a basar iti panangobserbarna ket adda dagiti kadua dagiti dadduma a pasiente a maipagarup a makisarsarita kadagiti empleado ti ospital no sadinno a masdaawto latta isunan nga umun-unanto dagitoyen ngem dagiti immun-una ngem kadakuada.
Gapu iti daytoy, kiniddawna iti ospital nga iyurnos a naimbag dagiti maiyim-implementar a pagalagadan tapno maipasigurado a maipatpatungpal met laeng ti “first come, first served basis” ken no adda dagiti priority lanes para kadakuada a senior citizens.
Naammoan a dinakamat ti maseknan nga empleado ti ospital iti nasao a pasiente a rumbeng nga addadan iti ospital iti oras ti alas kuatro ti parbangon tapno mangala ti numero dagitoy.
Kabayatanna, naidanon daytoy nga arungaing ken ni Gov. Cecilia Araneta Marcos no sadinno nga inpasingkedna a kasaritananto ni Dr. Arlene Ragasa, mangidadaulo ti nasao nga ospital tapno masolbar daytoy a parikot dagiti pasiente iti kabiitan a panawen.
