LAOAG CITY – Agsaksakit dagiti sumagmamano a residente iti Brgy. Suyo iti ili ti Dingras nangruna kadagiti ubbing ken natataengan gapu iti kinatapok ti kalsada iti lugarda.
Segun ken ni Barangay Chairman Amando Taylan Jr., ti nasao a barangay, dakkel a parikot kadagiti kabarangayanna ti natapok a mapaspasaran tunggal adda ti dumalyasat a lugan iti kalsada.
Inbatadna a bisibisanda ti nasao a kalsada tapno saanda unay a matapokan ngem kalpasan ti sumagmamano laeng nga oras ket makapasarda manen ti napuskol a tapok a mangitunda ti pannakarisgo ti salun-at dagiti residente.
Mainaig iti daytoy, inlawlawag ni Kapitan a nakasaritana metten ti mangimatmaton iti maiwaywayat a quarry operation maipanggep iti nasao a banag.
Nupay kasta, inpalgakna nga agpapan ita a gundaway ket saan pay a nasolbar ti problemada.
Kunana nga adda pay ti Memorandum of Agreement-da a nasken a siguradoen dagiti lugan ti quarry operation nga amin a pagdalyasatan dagitoy ket rumbeng a nasimpa ken nadalos.
Kabayatanna, naammoan nga idi pay tawen 2018 idi nangrugi ti quarry operation.
