LAOAG CITY – Inbutaktak ti Violence Against Women and their Children office ditoy ciudad ti Laoag nga agtultuloy nga adda dagiti mairekrekord da nga agtutubo a nasapa nga agsiksikog a bunga iti pannakarames da.
Segun ken ni Ms. Mary Joan Pasigui, Focal person ti Local Committee against Trafficking-Violence against Women and their Children nga adda ti saggaysa a nairekord da idi 2023 ken 2024.
Kunana a ti kaubingan a nairekord da ket agtawen ti 12 no sadinno a mismo a ti ama na iti nangrames ken nakasikog kenkuana.
Inpakaammo ni Pasigui a kayat koma ti biktima a paregreg ti sikogna gapu ta saanna a maawat a ti agbalin nga anakna ket maibilang pay a kabsatna.
Inadmitir ni Pasigui a narigatan da a nangkumbinsir iti biktima a mangawat iti sitwasyon na, ngem babaen iti idadalan na iti ado a counseling ken ti panangtarabay da kenkuana ket naallukoy da metlaeng daytoy a nangipasngay iti ubing, ken iti agdama ket nagsubli iti panagadal na iti elementarya.
Kuna na pay nga adda ti Gender and Development Center da nga isu ti temporaryo a pagnaedan dagiti biktima iti panagrames, ken pakaiwayatan ti nagduduma a serbisyo kas iti counseling ken lecture.
Inpanamnama ni Pasigui nga agtultuloy ti panangipaay da ti tulong kadagiti biktima tapno makaruk-at da manipod iti paspasaren da a trauma gapu iti napasamal kadakuada.
Innayon na nga adda pay ti ipapaay da nga skills training kadagiti biktima kas iti panagmasahe, manicure ken pedicure tapno adda ti pamastrekan da nga isu ti pangbiag da iti anakda.
