LAOAG CITY – Kinumpirmaran ni Police Major Joseph Tayaban, ti chief of police ti PNP-Badoc nga adda dagiti natiketan gapo iti panaglibas na iti border control iti ili ti Badoc.
Segun kenni Tayaban, sinita dagiti opisyales ti Barangay Sta. Cruz Sur dagiti agga-ama a naggapo iti probinsya ti Pangasinan gapo iti panaglibas da a mapan iti ili ti Pagudpud.
Inbatad na mapan dagitoy iti ili ti Pagudpud gapo ta adda ti trabaho ti ama ngem ti anak na ken ti nobya daytoy ket awan ti acceptance da iti barangay.
Kunana a kalpasan a nagnegatibo iti antigen tet dagitoy ken inakseptar met ti barangay a papanan da iti ili ti Pagudpud, nakastrek da met laeng ngem adda ti citation ticket da.
Mainaig iti daytoy, kunana nga adda pay ti nasita met laeng iti nasao a barangay a mapan da kuma met iti probinsya ti Ilocos Sur.
Inlawlawag na a kurang iti impormasyon dagiti maseknan mainaig iti panagruwar ditoy probinsya.
Kabayatanna, binalakadan met ni Tayaban ti publiko a masapol ti panangsurot kadagiti pagaladagan pakairamanen ti minimum health protocols.
