LAOAG CITY – Naiwaras ti sumurok 200 a Philippine National Police personnel para iti Grand Parade kas paset ti umuna nga aldaw ti Pamulinawen Festival ditoy siudad ti Laoag.
Segun ken ni Police Chief Master Sergeant Eric Bumagat, mangidadaulo ti Laoag City Police Station – Traffic Division, nangrugi a nai-deploy dagiti pulis itay alas dose ita nga aldaw kageddan ti pannakaserra dagiti kangrunaan a kalsada a maapektaran iti maisayangkat a parada.
Inbatadna a ti assembly area kadagiti makipaset ket ti Mabini Street no sadinno nga agturong dagitoy iti Bacarra Road, mapan iti Rizal Street ken agpa-laud.
Inlawlawagna a dagiti kangrunaan a napaserraan a kalsada ket iti paset ti Bacarra Road, daya a paset ti Rizal Street, Nolasco Street ken Panganiban Street.
Kunana a dagiti motorista a naggapu iti ili ti San Nicolas ket dimmalyasat iti bypass road nangruna kadagiti dadakkel a lugan kas ti bus.
Innayonna nga adda dagiti pulis ken traffic enforcers a mangbayabay kadagiti motorista tapno maitudo ti pagdalyasatanda.
Kabayatanna, inpakaammo ni Dr. Rodrigo Catcatan, mangidadaulo ti City Health Office ditoy siudad ti Laoag a kabinnuligda ti Bureau of Fire Protection, Philippine National Police, Department of Public Safety ken City Disaster Risk Reduction and Management Office tapno maipasigurado ti kinatalged dagiti umili.
