LAOAG CITY – Maragsakan dagiti Overseas Filipino Workers (OFWs) a saan a naswel-sweldoan iti sumagmamano a bolan kabayatan ti panagtrabaho da idiay Saudi Arabia.
Daytoy ket kalpasan nga inrakuran ni Labor Secretary Silvestre Bello III nga immanugot ti Saudi Arabia nga agbayad ti P4.6 billion para iti saan a nabaybayadan a sweldo dagiti maseknan nga OFWs.
Inlawlawag ni Mrs. Noraiza Barola, taga Currimao, Ilocos Norte overseas Filipino worker idiay Saudi Arabia a kaadoan kadagiti OFW a taga ditoy probinsya a saan a naswelsweldoan ket agpapaay kas construction worker iti nasao a pagilyan.
Inbatad na a basar iti report kadakuada, ti rason dagiti employers dagiti maseknan ket gapu iti agdama a mapaspasaran a pandemya a gubuay ti covid-19 virus no sadinno a maipagarop nga awan ti napaspastrek ti negosyo da.
Innayon na nga adda pay dagiti OFWs a 20 a tawen a saan a naik-ikkan ti benepisyo ken walo a bolan a saan a nasweldoan.
Gapu iti daytoy, kuna ni Barola a magagaran ken mangnamnama dagiti maseknan nga OFWs a maawat da iti kabiitan a panawen ti saanda a naaw-awat a sweldo da kabayatan ti panagtrabaho da idiay Saudi Arabia.
