LAOAG CITY – Natiliw dagiti tallo a lallaki gapu iti illegal a panagsusugal da iti Barangay Calambeg iti ili ti Piddig.
Inbatad ni Police Capt. Kristoffer King Ramos, ti chief of police iti ili ti Piddig a malaksid kadagiti tallo a natiliw da ket adda ti maysa a kadwa dagiti suspek a nakalibas.
Binigbig ni Ramos dagiti natiliw da nga isuda Jiovanni Doronio iti Barangay Cabaroan iti ili ti Piddig, Villaluz Vinoya iti Barangay Mabanbanag iti ili ti Vintar ken ni Santos Francisco, residente iti Barangay Gayamat iti ili ti Piddig idinto a ti nakalibas ket ni Rodolfo Doronio alyas Master, residente met iti Barangay Cabaroan iti ili ti Piddig.
Inpakaammo ni Ramos a sakbay a natiliw da dagiti nasao a suspek ket nagkikinnamatan da pay laeng gapu ta ginandat dagiti maseknan ti aglibas idinto nga agtultuloy ti manhunt operation da kontra ken ni Doronio.
Inbaga ni Ramos a nabayag dan a sisiimen dagiti suspek mainaig iti illegal nga aktibidad da.
Naamoan pay da Ramos a ti maysa kadagiti suspek a ni Vinoya ket benepisyaryo ti Social Amelioration Program (SAP).
Segun ken ni Ramos, pilaan da dagiti suspek ti reklamo nga Illegal a panagsusugal ken panaglabsing ti RA11332 wenno panaglabsing ti quarantine idinto a ni Doronio ket pilaan da pay ti sabali a reklamo mainaig iti illegal a panagkot ti saan a lisensyado nga armas ken bala.
Immuna iti daytoy, nakumpiskar dagiti otoridad ti maysa a nangisit a shoulder bag ni Doronio a naglaon ti maysa a Cal. 38 nga addaan ti 6 a bala.
