LAOAG CITY – Kinumpirmaran ni Department of Migrant Workers (DMW) officer-in-charge Hans Leo Cacdac a tallo a Pilipino ti nagsagaba ti minor injuries kalpasan ti napigsa a gingined idiay Taiwan.
Segun kenni Cacdac, maysa ti nagsagaba ti minor head injury gapo iti pannakarpuog ti bobeda, maysa pay ti nasugatan ti ima na bayat a maibakbakwit ken ti maysa ket naawanan ti puot kabayatan ti gingined.
Nupay kasta, inlawlawag na a dagiti tallo a Pilipino ket adda iti natalged a kasasaad ken dua kadagitoy ket nakarwaren iti ospital no sadinno ti nagtalinaed iti balay-pagagasan ket ti naawanan ti puot.
Mainaig iti daytoy, kuna ni Cacdac a dagiti nasugatan a Pilipino ket makaawat ti financial assistance manipud iti gobierno ken manarimaanen ti pannakikoordenar da iti Manila Economic and Cultural Office (MECO) idiay Taiwan para iti pannakaipaay ti tulong.
Naamoan a nasurok 159 a ribo a Pilipino ti adda idiay Taiwan no sadinno 65% kadagitoy ket factory workers nga agnanaed iti dormitories, idinto a ti 35% ket agtrabtrabaho iti balay kas caretakers.
