LAOAG CITY – Manamnama a malpas ti Terminal Building iti Laoag International Airport inton bulan ti Septiembre ita a tawen.
Segun ken ni Mr. Ronald Estabillo, Civil Aviation Authority of the Philippines Manager, apaman a malpas daytoy ket ad-adu ti maakomodarna no idasig iti dati ken ad-adda a napinpintas para kadagiti bisita lokal man wenno gangannaet.
Inbatadna a ti dati a Terminal Building ket adu dagiti nadadaelen a pasetna isu a maragsakan a dakdakkel ti baro a building.
Maipalagip a narugianan ti nasao a proyekto iti napalabas a tawen ken addaan daytoy ti 130 a milyon a pisos a pundo a proyekto ti Department of Transportation ken ti Provincial Government of Ilocos Norte.
Kabayatanna, inpakaammo ni Estabillo a nagtalinaed a dua laeng nga airlines ken domestic flight ti adda iti Laoag International Airport.
