LAOAG CITY – Naikeddeng a mai-ban ti nalatak a platform iti internet a TikTok idiay United States of America a kukua ti maysa a Chinese company a ByteDance inton bigat, Enero 19.
Daytoy ket kageddan ti desision ti Korte Suprema a mangpatpatibker iti linteg a mangipawil iti nasao a platform.
Inkeddeng ti korte a ti panangipawil ket saan nga aglabsing iti aniaman nga amendment rights ti TikTok nga addaan ti sumurok 170 million users.
Manamnama nga agtugaw ni President-elect Donald Trump kas Presidente ti Estados Unidos inton Enero 20, maysa nga aldaw kalpasan a maipatungpal ti pannakai-ban iti TikTok no sadinno a nakadepende ti sangsangoen ti nadakamat a platform iti babaen ken ni Trump.
Iti baet a dati a sinuportaran ni Trump idi 2024 dagiti addang tapno ipawil ti TikTok idiay America ngem kunana a pinadasna a maitantan ti pannakaitungpal daytoy.
Inpettengna a nasken laeng nga irespetar ti desision ti Korte Suprema.
Kunana a kasapulanna a mangiyalokar ti panawen tapno tingitingen sakbay nga agaramid ti baro a desision maipenggep iti situasion ti TikTok.
Dinakamatna a nakisarita isuna maipanggep iti nasao a platform ken Presidente Xi Jinping ti China pakairamanan kadagiti isyu iti negosio.
Mainaig iti daytoy, inrakurak ni incoming National Security Mike Waltz nga ar-aramiden ni President-elect Trump ti dadduma pay a wagas tapno ma-‘preserve’ ti TikTok para kadagiti Amerikano a kalikagumna nga i-access ken maprotektaran dagiti personal data-da.
Naammoan a ti kangrunaan a rason no apay a kalikagum ti Estados Unidos nga ipawil ti TikTok ket adda ti pakainaiganna maipanggep iti seguridad kangrunaanna ti posibilidad a maipagarup a maus-usar ti nasao nga app tapno makaukkon ti datos para kadagiti gagem nga agmanipula.
